ដោយ៖ស-សម្បត្តិ

ភ្នំពេញ៖ សមាគមសហព័ន្ធភ្នាក់ងារសេវាកម្មពន្ធដារកម្ពុជាហៅថាCTAFAបានចុះអនុស្សរណៈយោគយល់គ្នាជាមួយក្រុមហ៊ុន BKD Academy នៅស្នាក់ការសមាគមCTAFAដែលមានទីតាំងស្ថិតនៅបុរីអ័រគីដេ ដឹពោធិ៍ចិនតុង ភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ កាលពីព្រឹកថ្ងៃទី០៤ ខែមេសា ឆ្នាំ២០២៥។

ឯកឧត្តមអ៊ុំ សារ៉ាវុធ ប្រធានសមាគCTAFAបានបញ្ជាក់ថា គោលសំណងសំខាន់នៃការចុះអនុស្សរណៈជាមួយ BKD Academy នៅពេលនេះ គឺដើម្បីបានក្លាយជាដៃគូយុទ្ធសាស្រ្ត សម្រាប់បណ្តុះបណ្តាលលើវិស័យទីផ្សារឌីជីថល ដែលក្នុងនោះរួមមាន៖ Ai for business, Marketing & Digital Marketing, Leadership &Professional Development ក្នុងការជួយជំរុញផ្នែកផ្សព្វផ្សាយលើកិច្ចការ ពន្ធដារ គណនេយ្យ និងសវនកម្ម។

ឯកឧត្តមអ៊ុំ សារ៉ាវុធ ប្រធានសមាគម CTAFA បានបញ្ជាក់បន្ថែមថា នេះគឺជាផ្នែកមួយនៃការចូលរួមជាមួយរាជរដ្ឋាភិបាលដែលយើងបានផ្តល់នូវចំណេះដឹងពាក់ព័ន្ធនឹងបច្ចេកវិទ្យាទំនើបពិសេសគឺកម្មវិធីAIតាមរយៈការបណ្ដុះបណ្ដាលផ្សេងៗដែលធ្វើឲ្យម្ចាស់អាជីវកម្មយល់ដឹងកាន់តែច្បាស់ពីការប្រើប្រាស់បច្ចេកវិទ្យាក្នុងអាជីវកម្ម។

ឯកឧត្តមបានលើឡើងថា សេដ្ឋកិច្ចជាតិរីកចម្រើនទៅបានឆាប់រហ័ស លុះត្រាតែម្ចាស់អាជីវកម្មទាំងតូចទាំងធំទាំងអស់ ចូលរួមចំណែក កសាងនូវទំនាក់ទំនងនិងពង្រីកអាជីវកម្ម ឱ្យទាន់សម័យបច្ចេកវិទ្យាទំនើប។ផ្ទុយទៅវិញបើមិនដូច្នោះទេយើងនឹងមិនអាចដើរតាមទាន់គេឡើយ។

លោកយ៉ន សុភារិទ្ធ ស្ថាបនិក និងជានាយកគ្រប់គ្រងក្រុមហ៊ុន BKD Academy បានបញ្ជាក់ថាពាក្យថាបច្ចេកវិទ្យា AI (បញ្ញាសិប្បនិម្មិត)នេះគឺ មិនមែនប្រើបានតែនៅក្នុងការស្រាវជ្រាវទូទៅនោះទេ នៅក្នុងវិស័យពន្ធដារ គណនេយ្យ សវនកម្ម ជាដើម ម្ចាស់អាជីវកម្មក៏អាចរួមបញ្ចូលនូវការប្រើបច្ចេកវិទ្យា AI នេះបានដែរ។ ដែលវាជួយពន្លឿននូវកិច្ចការងារដល់ម្ចាស់ជីវកម្ម និងបុគ្គលិកជំនាញគ្រប់រូប គ្រប់ផ្នែកទាំងអស់ សំខាន់គឺការចេះប្រើប្រាស់វា។

លោកយ៉ន សុភារិទ្ធ បានបញ្ជាក់ឲ្យដឹងទៀតថា នៅពេលដែលម្ចាស់អាជីវកម្មទាំងអស់បានយល់ដឹងច្បាស់លាស់ពីបច្ចេកវិទ្យាទំនើប ហើយយកវាទៅប្រើប្រាស់ក្នុងការធ្វើអាជីវកម្មជាក់ស្តែងរបស់លោកអ្នកនោះវានឹងធ្វើឲ្យអាជីវកម្មកាន់តែរីកចម្រើនប្រកបដោយប្រសិទ្ធភាព។ នៅពេលនោះវាក៏បានក្លាយជាផ្នែកមួយដ៏សំខាន់ទៀត ក្នុងការជួយជំរុញសេដ្ឋកិច្ចជាតិ ដែលស្របទៅនឹងយុទ្ធសាស្ត្របច្ចុកោណរបស់រាជរដ្ឋាភិបាល។

សូមបញ្ជាក់ថា សមាគមសហព័ន្ធភ្នាក់ងារសេវាកម្មពន្ធដារកម្ពុជា CTAFA ចាប់តាំងពីបានបង្កើតឡើងរហូតមកដល់ពេលនេះគឺបានបំពេញតួនាទីរបស់ខ្លួនយ៉ាងច្រើនជាពិសេសគឺចូលរួមជួយផ្តល់ប្រឹក្សាយោបល់ពីបញ្ហាផ្សេងៗពាក់ព័ន្ធនឹងពន្ធដារ គណនេយ្យ និងសវនកម្មទៅដល់ម្ចាស់អាជីវកម្មឲ្យអនុវត្តបានត្រឹមត្រូវទៅតាមច្បាប់។

លើសពីនោះសមាគមCTAFAក៏បានចុះអនុស្សរណៈយោគយល់ជាមួយសមាគម,ស្ថាប័ននិងវិទ្យាស្ថានសំខាន់ៗជាច្រើននៅកម្ពុជា ក្នុងគោលបំណងចម្បងបំផុត គឺធ្វើយ៉ាងណាដើម្បីពង្រីកបណ្តាញទំនាក់ទំនងឲ្យកាន់តែធំទូលាយងាយស្រួល ក្នុងការបំពេញបេសកកម្មរបស់ខ្លួនឲ្យកាន់តែមានប្រសិទ្ធភាពសម្រាប់ជួយប្រឹក្សាយោបល់ទៅដល់ម្ចាស់អាជីវកម្មទាំងអស់៕